الشارع محتاج لوزير
ـــــــــــــــــــــــــــــــ
والشارع موضوعة يحير
الشارع موضوعة كبير
رافد اعلامى واعلانى
ومنارة لشعلة تنوير
الشارع بصمة حضارية
الشارع محتاج تمصير
خط دفاع أول متقدم
الشارع محتاج لوزير
عصب التنمية البشرية
محتاج لروشتة ومعايير
مركز تسويق بير السلم
الشارع عصب التطوير
شريان حيوى لصرح تجارى
يتعامل مع غنى وفقير
كوكتيل أنشطة استثمارية
الشارع رافد تصدير
الشارع من ملكك بس
الشارع مدلولة خطير
بيقدم أكثر من رؤية
بتحدد أهداف ومصير
فى منافسة غبية وضبابية
بتقوىالأحساس بالغير
وتسلم بحقوق الآخر
وبتعكس نبض الجماهير
الشارع محتاج تفكير
بروية وحسن التدبير
فى ملامح خطة سياسية
تتنفذ بهدوء وضمير
وتحدد أطر المستقبل
وتبين بؤر التقصير
لمواجهة أمطار رعدية
وعواصف ثلج وأعاصير
على مدد الشوف كل الشارع
بيعانى تخلف ومراجع
والشارع كان حالة يحير
ولا له عنوان ولا له طابع
وحركته ما هياش متناغمة
مع رتم العصر المتسارع
من حفرة لنقرة لدحديرة
لمطب مكعبر وتقاطع
ومضلم ومالهش رصيف
والكل بيشكى وبيصارع
دوامة ربو وغيبوبة
من انبعاثات شمبر والع
والخانع مش ممكن يحلم
ولا حتى المهموم القانع
والجاهل من فين راح يعلم
إن التطوير روح الشارع
محافظنا كان قد القول
ميدانى ولابس أفرول
من بدرى بيصول ويجول
ومنور وف وشه قبول
ولأنه نشانجى ومتحمى
وإدارجى وعننا مسئول
استعصم بالعروة الوثقى
وبحبل الله الموصول
ولأنه محصن بعقيدة
وبثقة الريس مشمول
ولأنه أمين على مصالحنا
اتشمر وبدأ على طول
والشعلة بتنطق وتقول
فى ميدان الجندى المجهول
فارقنا واهمد يا عزول
بعينيك المعكورة دول
محافظنا للبيئة صديق
منظومة وفكر وتطبيق
على أجمل موجة فرايحية
فى عيونه ومضات وبريق
نجم التخطيط العمرانى
بصماته بتبل الريق
علمنا وخد بالأسباب
وفتح أبواب للتسويق
واستحدث للإستثمار
ميت ألف طريقة وطريق
وبيحمى رجال الأعمال
وجعلهم للنهضة فريق
ولأعظم نهضة حضارية
الشارع واسع ومضىء
يكفيكم من شر الزنقة
يكفينا من شر الضيق
ــــــــــــــــــــ
تأليف الشاعر الغنائى صفى الدين ريحان
عضو اتحاد كتاب مصر
عضو جمعية المؤلفين والملحنين بباريس
ليست هناك تعليقات:
إرسال تعليق